ကိုရိုနာ-19က ကိုရီးယားကို ဝင်လာတာ 2လကျော်လို့ 3လထဲ ရောက်တော့မယ်ဆိုတော့ စီးပွားရေး လုပ်ငန်းတွေ၊ အလုပ်သမားတွေ၊ စျေးဆိုင်တွေလည်း ညည်းငြူလာကြပြီ။ တချို့ တိုင်းဒေသကြီး အစိုးရတွေကတော့ ချို့တဲ့တဲ့ လူတန်းစားတွေကို တစ်လ ၃သိန်းနှင့်အထက် ထောက်ပံ့ကြေးများ ထောက်ပံခြင်းများ လုပ်ဆောင်လျက် ရှိပါတယ်။ တစ်နိုင်ငံလုံး အနေအထားနဲ့ ကပ်ဘေးရှောင် ထောက်ပံ့ကြေးပေးဖို့ တင်ပြခဲ့ပေမဲ့ ဆိုင်းငံ့ထားခဲ့တာဟာ ယနေ့မှာတော့ သမ္မတ မွန်းဂျယ်အင်းမှနေပြီး တစ်နိုင်ငံလုံး အတိုင်းအတာနဲ့ ၄ယောက်မိသားစုနှုန်းကို ထောက်ပံ့ကြေး ၁၀သိန်း ထောက်ပံ့ဖို့ ကြေငြာလိုက်ပါပြီ။

        ဆိုလိုတာ 4ယောက်မိသားစု ဝင်ငွေက တစ်လ ၇၁သိန်း၂သောင်းနှင့် အထက်ဆိုရင် အစိုးရ ထောက်ပံ့ကြေး မရပါဘူး။ 4ယောက် မိသားစုဆို 10သိန်း၊ သူ့ထက် နည်းရင် ထောက်ပံ့ကြေးလည်း လိုက်နည်းပြီး၊ 4ယောက်ထက် များတယ်ဆိုရင်လည်း မိသားစုဝင် အရေအတွက်အလိုက် ထောက်ပံ့ကြေးလည်း အပြောင်းအလဲ ရှိမယ်ဆိုတဲ့ သဘော ဖြစ်တယ်။

‌   ဖော်ပြပါ တစ်လဝင်ငွေနှုန်းနှင့် အထက် ဝင်ငွေ ရရှိနေသော မိသားစုများကတော့ ထောက်ပံ့ကြေး ရရှိမှာ မဟုတ်ပါ။ အမှန်တကယ် ချပေးတဲ့အခါ သတ်မှတ်ဝင်ငွေနှုန်းက ဖော်ပြထားတာထက် အနည်းငယ် နိမ့်သွားမယ်လို့ ခန့်မှန်းရပါတယ်။ ဒါဟာ လစဥ်ပေးဆောင်ထားတဲ့ အာမခံကြေးကိုပါ ထည့်သွင်းစဥ်းစားသွားမှာ ဖြစ်တဲ့အတွက်ကြောင့် ဖြစ်ပါတယ်။ 

   ထို့အပြင် အာမခံကြေး လျှော့ကောက်ခြင်း၊ ချို့တဲ့ လူတန်းစားများအတွက် သီးသန့် ထပ်ပေါင်းထောက်ပံ့ခြင်း စသည့် နည်းလမ်းများနှင့် ပတ်သက်ပြီးလည်း ဆွေးနွေးခဲ့ပါတယ်။ သမ္မတ မွန်းဂျယ်အင်းကတော့ “အစိုးရကတော့ ဝင်ငွေနည်းသည့် လူတန်းစားများနှင့် သတ်မှတ်ထားသည့် ပမာဏအောက် အသေးစား၊ အလတ်စား လုပ်ငန်းများအတွက် အာမခံကြေးနှင့် မီတာခများ ပေးဆောင်ရက်များ နောက်ရွှေ့ပေးခြင်း၊ သို့မဟုတ် လျှော့ချ ကောက်ခံခြင်းများ လုပ်ဆောင်ရန် ဆုံးဖြတ်ခဲ့ပါတယ်။ ဒီ ဆုံးဖြတ်ချက်ကိုတော့ 3လပိုင်းအတွက် ပေးဆောင်ရမယ့် အခွန်အခများမှ စတင်ပြီး အသက်ဝင်စေပါမယ်။ လို့ ပြောကြားခဲ့ပါတယ်။

အခုမှ နားလည် သဘောပေါက်သွားတာကတော့ အစိုးရကို အခွန်ဆောင်တယ်ဆိုတာ အလကား ဆောင်နေကြတာ မဟုတ်ဘူးဆိုတာပါပဲ။ အရေးကြုံလာတော့ အဲ့ဒီအခွန်တွေပဲ ထုတ်သုံးကြရတာပါပဲ။ ကိုယ်လည်း အခွန်ဆောင်းထားရတာ။ အခွန်အဖြတ်ခံရတိုင်း ငိုချင်ခဲ့ပေမဲ့ အခုလို အကျိုးရှိရှိ အသုံးချတာ မြင်ရတော့လည်း ပီတိဖြစ်ရပါတယ်။

အမှန်တကယ်ဆိုရင် ဝင်ငွေ ပိုများတဲ့ သူတွေက အခွန် ပိုတောင် ဆောင်ရသေးတဲ့ဟာကို တကယ်တမ်း ပြန်လည် ထောက်ပံ့တော့ သူတို့တွေကို ဖယ်ထားခဲ့တယ်။ ဒါကို မကျေနပ်တဲ့ သူတွေလည်း ရှိတာပေါ့နော်။ ဒါပေမဲ့ အစိုးရဆိုတာ ချင့်ချိန်ပြီး လုပ်သင့်တာကို လုပ်တာ၊ ဥပဒေနဲ့ ကိုင်ပြီး လုပ်တာ ဖြစ်တဲ့အတွက် မကျေနပ်တဲ့ သူ ရှိလည်း ရှိရှိပဲလေ။ ပြည့်နေတဲ့ အိုးကို လျှံကျအောင် ထပ်ဖြည့်ရလောက်အောင် နိုင်ငံတော်ရဲ့ ဘဏ္ဍာက ပိုလျှံနေတာ မဟုတ်ဘူးလေ။ ဒါကို ဒီမှာ တော်တော်များများတော့ နားလည်ပေးကြပါတယ်။

ကိုးကား။ https://www.mk.co.kr/news/politics/view/2020/03/326691/

Q: ကိုရိုနာက ဘယ်လိုမျိုး ကူးစက်တတ်လဲ။

A: ချောင်းဆိုးတဲ့အခါ ထွက်လာတဲ့ တံတွေးမှုန်၊ နှာချေတဲ့အခါ ထွက်လာတဲ့ နှာရည်မှုန် စတာတွေနဲ့ ထိတွေ့မှုတွေကနေ ကူးစက်ပြန့်ပွားတယ်လို့ ခန့်မှန်းရပါတယ်။ ရောဂါပိုး ရှိသူက စကားပြောတဲ့အခါပဲဖြစ်ဖြစ်၊ ချောင်းဆိုးတဲ့အခါပဲဖြစ်ဖြစ် သူ့ဆီက ထွက်လာတဲ့ နှာရည်မှုန်၊ တံတွေးမှုန်လေးတွေဟာ 1-2မီတာလောက်ထိ စင်ထွက်လာနိုင်ပါတယ်။ ထို အမှုန်တွေဟာ တခြားသူရဲ့ အသက်ရှူလမ်းကြောင်းထဲကို တိုက်ရိုက် ဝင်သွားနိုင်သလို စားပွဲ၊ လက်ကိုင် စတာတွေမှာ ကပ်နေပြီး ထို ရောဂါပိုး ကပ်နေတဲ့ စားပွဲတို့ အရာဝတ္တုများကို ကိုင်မိတဲ့သူက လက်မဆေးဘဲ မိမိ၏ ပါးစပ်တို့၊ နှာခေါင်းတို့ကို ကိုင်မိရင် အမှေးပါးတွေ၊ အသက်ရှူလမ်းကြောင်းက တစ်ဆင့် ဝင်ရောက်သွားနိုင်ပါတယ်။ ကိုရိုနာ-19က လေထဲမှာ လွင့်နေရာကနေ ကူးစက်တာတို့ ဘာတို့ တော့ မတွေ့ရှိရပါ။

Q: မျက်လုံးတို့ အရေပြားမှ တစ်ဆင့် ကူးစက်နိုင်သလား။

A: ကိုရိုနာ ဗိုင်းရပ်စ်က တခြားသော အဖျားပိုးတွေနဲ့ ယှဥ်ရင် စားပွဲတို့၊ လက်ကိုင် စသည်တို့မှာ အချိန်ကြာကြာ ကပ်ပြီး အသက်ရှင်နေနိုင်တယ်။ အဲ့တော့ ကိုယ်တွေ သတိမထားမိလိုက်ဘဲ ရောဂါပိုး ကပ်နေတဲ့ အရာကို ကိုင်လိုက်မိရင် ထို လက်နဲ့ မျက်လုံး စတဲ့ အမှေးပါးလေးတွေ၊ နှာခေါင်း၊ ပါးစပ်တို့ကို ထိမိလိုက်ရင် အသက်ရှူလမ်းကြောင်းထဲကနေ ရောဂါပိုး ဝင်သွားနိုင်ပါတယ်။ ဒါ့ကြောင့် လက်ဆေးရည်(ပိုးသတ်ဆေး) စတာတွေနဲ့ လက်သန့်ရှင်းရေးကို အထူး သတိပြု လုပ်ဆောင်ခြင်းဟာ ရောဂါပိုးကို ကာကွယ်နိုင်ပါတယ်။ အရေပြားကနေတော့ တိုက်ရိုက် ဖောက်ပြီး ခန္ဓာကိုယ်ထဲကို မဝင်နိုင်ပါဘူး။

Q: ဗိုင်းရပ်စ်က အဝတ်အစားတွေမှ တစ်ဆင့် ကူးနိုင်လား။

A: ဗိုင်းရပ်စ်က အဝတ်အစားလိုမျိုး အပြည့်အဝ မသန့်ရှင်းတဲ့ ဟာမျိုးမှာ မနေနိုင်ပါဘူး။ ဆေးရုံ လူနာမေးသွားတာတို့၊ ရောဂါပိုးရှိနိုင်တဲ့ သူမျိုးနဲ့ ပတ်သက်မှု မရှိဘူးဆိုရင် ပိုးသတ်စရာ မလိုပါဘူး။

Q: ဗိုင်းရပ်စ်က ဆံပင်မှာ ကပ်နိုင်လား။

A: ပုံမှန်အားဖြင့် အပြင်က ပြန်လာတယ်ဆိုပြီး ခေါင်းလျှော်တာတို့ ၊ ပိုးသတ်ဆေး ဖျန်းတာတို့ လုပ်စရာ မလိုပါဘူး။ လက်ရှိ လေ့လာစမ်းသပ်ချက်များအရ ဗိုင်းရပ်စ်က ပြင်ပ ခရမ်းလွန်ရောင်ခြည်ကို ကြောက်တယ်။ အပြင်ကနေပြီး ဗိုင်းရပ်စ်က ကပ်ပါလာနိုင်ချေ အင်မတန်မှ နည်းတဲ့အတွက် ပုံမှန် ခေါင်းလျှော်နေကျအတိုင်းပဲ လျှော်ရင် ရပါတယ်။

Q: ရောဂါလက္ခဏာ မပြသေးတဲ့ သူဆီကနေရော ရောဂါပြန့်ပွားနိုင်လား။

A: ရောဂါလက္ခဏာ မပြသေးသူကို ရိုးရိုး x-ray ရိုက်ကြည့်တဲ့အခါမှာတော့ သိပ်မသိသာပေမဲ့၊ CT စစ်ဆေးမှု အဖြေမှာတော့ ကိုရိုနာ-19 ကူးစက်ခံထားတာကို တွေ့ရပါတယ်။ ဇန်နဝါရီလ 30ရက် The New England Journal of Medicine (NEJM) က ထုတ်ပြန်ထားတဲ့ စာတမ်းအရ ရောဂါလက္ခဏာ မပြသေးခင် လူနာကနေ တစ်ဆင့် ကူးစက်ခံရသူများ ရှိနေတဲ့ case များ ရှိနေတယ်လို့ ဖော်ပြထားပါတယ်။

Q: နှာခေါင်းစည်း မဖြစ်မနေ တပ်ရမှာလား။

A:

1. ကိုရိုနာ-19 ကျန်းမာရေး ညွှန်ကြားချက်များအတိုင်း ဖုန်း အစရှိသည့် ကိုယ်ပိုင်ပစ္စည်းများ သန့်စင်ခြင်း၊ တစ်ဦးနှင့် တစ်ဦး သတ်မှတ်အကွာအဝေးအတိုင်း ခပ်ခွာခွာ နေခြင်း၊ အခန်း လေလှယ်ခြင်း စသည့် တစ်ကိုယ်ရည် သန့်ရှင်းရေးများကို သတိထား လုပ်ဆောင်ပါ။

2. ရောဂါပိုး ရှိသူနှင့် ထိတွေ့ဆက်ဆံခြင်း၊ ရောဂါကူးနိုင်ချေများတဲ့ အနေအထား၊ နဂို အသက်ရှူ လမ်းကြောင်းဆိုင်ရာ ရောဂါရှိနေတဲ့ သူများကတော့ ကျန်းမာရေးသုံး နှာခေါင်းစည်း(N95, K80, K94, K99)မျိုးကို သုံးပေးသင့်ပါတယ်။

3. ရောဂါပိုး ကူးနိုင်ချေ မရှိတဲ့ နေရာ၊ ကျန်းမာရေးသုံး နှာခေါင်းစည်း မရှိတဲ့ နေရာမှာဆိုရင်တော့ တခြားသူရဲ့ တံတွေးမှုန်များ မစင်အောင်ဘဲ ကာပေးတဲ့ ချည်သား(ဇကာပါတဲ့)နှာခေါင်းစည်းကို သုံးပေးရင် အထောက်အကူ ဖြစ်ပါတယ်။

4. လူမစည်ကားတဲ့ ပြင်ပနေရာ၊ အိမ်မှာ၊ ကိုယ်တစ်ယောက်တည်း ရှိနေတဲ့အခါမှာတော့ နှာခေါင်းစည်း တပ်ထားစရာ မလိုပါဘူး။

ayeayeaung

2020.03.23. ရက်နေ့မှာ ကိုရိုနာ-19 အတည်ပြု လူနာ 2ယောက် စတင် တွေ့ရှိခဲ့ပြီးနောက်

အစစအရာရာ ချို့တဲ့လှတဲ့ ကိုယ့်နိုင်ငံအတွက် အရမ်းစိတ်ပူသွားခဲ့တယ်။

ခေါင်းထဲမှာ အီတလီကလိုမျိုး မနိုင်မနင်း ပြန့်ကုန်ရင်တော့ ဒုက္ခပဲဆိုပြီး

ဘုရားတရင်း စောင့်ကြည့်နေခဲ့တယ်။

ဒီ ကပ်ဘေးမှာ သိလိုက်ရတဲ့ အသိ တစ်ခုက ဘာလဲဆိုတော့

နည်းပညာပိုင်း နောက်ကောက်ကျလျှင်သာ ကျနေမယ်။

စေတနာနဲ့ ပူးပေါင်းပါဝင်မှုမှာ တို့နိုင်ငံက နောက်ကောက်မကျဘူးဆိုတဲ့ အသိဖြစ်တယ်။

အစိုးရကလည်း နိုင်သလောက် လိုက်ပြီး ဆောင်ရွက်တယ်။

ပြည်သူတွေကလည်း တတ်နိုင်တဲ့ ဖက်ကနေ ဝိုင်းဝန်းကူညီကြတယ်။

၁။ ကိုရိုနာ-19 ဖြစ်ပွားမှု များနေတဲ့ ပြည်ပနိုင်ငံမှ ပြန်ဝင်လာတဲ့ သူတွေကို

14ရက်ကြာ စောင့်ကြည့်ဖို့အတွက် နေရာ အခက်အခဲအတွက်

တရားစခန်းတွေ၊ ကုမ္ပဏီပိုင် သင်တန်း‌ကျောင်း ‌‌နေရာတွေကို

အခမဲ့ အသုံးပြုခွင့်ပေးပြီး၊ ကျွေးမွေးစောက်ရှောက်ပေးခြင်း။

၂။ ပရဟိတအဖွဲ့တွေကနေပြီး လူတွေ အပြင်ဖက် အသွားအလာ နည်းသွားအောင်

လိုအပ်တဲ့ ပစ္စည်းပစ္စရတွေကို ဝန်ဆောင်ခ တစ်ပြားတစ်ချပ်မှ မယူဘဲ

ကိုယ်စား ဝယ်ခြမ်းပြီး အိမ်တိုင်ရာရောက်

လိုက်ပို့ပေးပါမည်ဆိုတဲ့ ပရဟိတ စိတ်ဓာတ်များ တွေ့ရခြင်း။

၃။ မီးလန့်တုန်း ဖျားခင်းချင်ကြတဲ့ တချို့တချို့သော တစ်ကိုယ်ကောင်းသမားများ

ရှိနေသကဲ့သို့ သူတို့ရဲ့ တစ်ဖက်တစ်ချက်မှာ စျေးတင်ခြင်း

လုံးဝ မပြုလုပ်ဘဲ ပုံမှန်စျေးအတိုင်း လိုချင်သလောက်

ရောင်းချပေးပါမည်ဆိုတဲ့ ကုန်သည်များရဲ့ ပူးပေါင်းဆောင်ရွက်လိုစိတ်များ တွေ့ရခြင်း။

၄။ ဆေးဖက်ဆိုင်ရာ ဝန်ထမ်းများ၏ အားတက်သရော

ပူးပေါင်းဆောင်ရွက်လိုသည့် တာဝန်သိစိတ်များ တွေ့ရခြင်း။

၅။ ပြည်သူအချင်းချင်း မလိုအပ်ဘဲ အပြင်မထွက်ဖို့ နှိုးဆော်ခြင်း။

ကိုယ်တိုင်လည်း မလိုအပ်ဘဲ အပြင်မထွက်ကြဘဲ အိမ်မှာ နေပေးခြင်း။

စသည့်အချက်များကို ကြည့်ခြင်းအားဖြင့်

တို့နိုင်ငံကို ကိုရိုနာ-19က မဖြိုနိုင်ဘူးဆိုတဲ့

ယုံကြည်ချက်လေး ပေါ်လာတယ်။

တက်လာတဲ့ ဝိုင်းဝန်းကူညီကြတဲ့ သတင်းတွေ ဖတ်ရင်း

မျက်ရည်တောင် လည်မိတယ်။ အရမ်းလည်း ဝမ်းသာဂုဏ်ယူမိတယ်။

ဒါပေမဲ့ လိုနေသေးတဲ့အချက် တစ်ခု ရှိသေးတယ်။

နည်းပညာပိုင်း အကူအညီဖြစ်တယ်။

လိုအပ်ရင် လိုအပ်သလို ကိုရိုနာကို နိုင်နိုင်နင်းနင်း

ကိုင်တွယ်နေတဲ့ ကိုရီးယားတို့၊ တရုတ်တို့လို နိုင်ငံတွေဆီကနေ

အကူအညီ တောင်းဖို့ကို လုံးဝလုံးဝ လက်မတွန့်ရန် ဖြစ်တယ်။

2020.03.24. ရက်နေ့မှာ ကမ္ဘာ့အတိုးတက်ဆုံး နိုင်ငံဖြစ်တဲ့

အမေရိကန် သမ္မတ ဒေါ်နယ်လ်ထရန့်တောင်

ကိုရီးယားသမ္မတဆီ ဖုန်းဆက်ပြီး ဆေးဖက်ဆိုင်ရာ ပစ္စည်းများ

အကူအညီပေးနိုင်မလားဆိုပြီး တောင်းခံလာပါတယ်။

ကိုရိုနာကို အနိုင်တိုက်နေတဲ့ ကိုရီးယားဖက်ကလည်း

အပိုရှိရင် အကူအညီပေးပါ့မယ်။ဆိုပြီး ဖြေကြားခဲ့တယ်။

ထရန့်က ဘာပစ္စည်း ဘာပစ္စည်းဆိုပြီး မပြောခဲ့ပေမဲ့

သူ့ရဲ့ twitterမှာ တင်ထားတာကို ကြည့်ခြင်းအားဖြင့်

နှာခေါင်းစည်းနဲ့ ventilators(အသက်ရှူစက်) ဖြစ်ဖို့ များကြောင်း ခန့်မှန်းရပါတယ်။

အစိုးရနှင့် ပြည်သူ ပူးပေါင်းပြီး ဒီ ကိုရိုနာ-19 ဗိုင်းရပ်စ်ကို

ရက်တိုတိုနဲ့ အပြတ် အနိုင်တိုက်နိုင်ပါစေလို့ ဆုတောင်းရင်း။

အရေးကြီးရင် ‌သွေးစည်းကြတဲ့ တို့မြန်မာ‌တွေအတွက် ဂုဏ်ယူရင်း။

 ayeayeaung